تعليق ليا علي بوست صديق عزيز ...

تعليق ليا علي بوست صديق عزيز ...
شوف يا محمد ... وحاول تركز معايا ... الاخوان اكتر من نوع ... نوع نشسط و فاعل و ضمن هيكل و خلية و دا عمله بيكون سري ف الاغلب زي ما علموه... ودا بيخنلف من وقت للتاني لبدرجة انه ممكن يجهل كل شئ عن تعاليم حسن البنا و يتأثر بالتحولات و المراجعات ... وفيه اخواني بيساعد من بعيد لبعيد ...مصلحة من الاخر ... وفيه المتعاطف معاهم و دا مجرد صوت ف مظاهرة لكنه للاسف ما يعرفش غير من بره ... لانه مهما اتعاطف لكنه مش اخواني ... ودا اللي بيتاخد ف الرجلين اول واحد بسبب نيته الحسنة ... وفيه الاخواني المحايد ودا بيبقي مكروه جدا من الاخوان لانه ف نظرهم منشق و من غير الاخوان لعدم ايمانهم بيه وتصديقه ... ودا لان الاحواني بطبعه بيرفض النقد لتلقينه انه علي صواب مهما اخطأو للاسف دا بيحوله لجيتو وسط المجتمع مهما ادعي العكس ... ولان المجتمع بيتحول لارض معركة غير مسموح بالخسارة او بالامور الوسط ظهرت اصوات كتيرة قوي من الطوائف و الانواع اللي كلمتك عنها بنرفض فكرة الوطن من جذورها متأثرة ببعض تعليمات حسن البنا و سيد قطب المعاد تفسيرها خصوصا بعد المراجعات ... و طبعا الرأي دا بيصدم باقي المجتمع فبيزداد الاقصاء ... وعشان كده ح تلاقي الفصيل دا بيشمت ف اي حاجة بتحصل للمجتمع و بيعلي من فكرة قتلانا ف الجنة و قتلاهم ف النار ... لما ييجي الفصيل دا و يعترف علي نفسه مقدما بأنه ح يعمل عمليات ارهابية و تتنفذ ... ساعتها ماتقوليش دا شغل امن دولة و بتاع ... انت اللي ادت الفرصة بتهورك و سذاجتك السياسية ... اما الصهاينة اصدقاءك الاعزاء زي ما مرسي كتب ليهم ... فعلي الرغم اني لا استبعد اي شئ ... لكن الاعتراف سيد الادلة ... الاخوان معترفين علي نفسهم بنفسهم ... نعمل لك ايه تاني

خير الاشعار ما تتلوها العيون

خير الاشعار ما تتلوها العيون

ف القلب صراع رهيب

ف القلب صراع رهيب
و ح اقوله و ع المكشوف
انا ليه مانفعش حبيب
ف العشق يطير و يطوف
وانا بادي لنفسي سؤال
واجابته ناقصة حروف
ليه باحس الحب محال
ودا جبن ولا دا خوف
والحلم بأيام جاية
ليه صار اسطورة سيزيف
لا أمل و لا حتي بداية
ولا حضن عاشق ملهوف
وحنان رغم المعاناة
ماهو تمن الحب ألوف
بتأجل اعيش لي حياة
ملعون ف أسواها ظروف
خايف اجرح و انتي جرحتي
ولافيش عيون بتشوف
ف القلب احلامي دبحتي
ودوايا مش موصوف
وبادور علي احلامي
ف ضلام ومالهش سقوف
وان شفته ف يوم قدامي
باضحك و باقول مخطوف
وانا عايش ليه مش عارف
مش لاقي كلام معروف
انا ح افضل عايش خايف
من عشق واقف ف الجوف
...

مش فايق والله يا خويا.. .الشعر دا روقان بال....

مش فايق والله يا خويا..

.الشعر دا روقان بال....

والفرحة دي دهنة بوية...

علي حزن يغطي جبال...

معقول بكلامي راح اقدر..

.اتغير حال عن حال....

ولا انا بالشعر باكفر...

عن ذنبي ب ١٠٠ موال

تبتسمين فتنثريني ندي...

تبتسمين فتنثريني ندي...
وفي ظل رمشك اتمددا...
سبحان من خلقك آية....
فأبدع في الجمال اليدا

محمود فاروق

حصلت حاجتين احلي من بعض الليلة دي ...

حصلت حاجتين احلي من بعض الليلة دي ...
روحت اصلي التراويح ف الحسين و كان القارء صوته رائع بمعني الكلمة ... وقفاته كانه بيشرح ليك القرأن ... و عربه بتخليك تطير معاه للسما ...
خسارة انه مش بيقرا جزء كامل ...
الموقف التاني اني خلصت التراويح و انا معدي علي الجامع الازهر كان لسه بيدي الدرس ف استراحة التراويح ... لسه بدري ...
بالظبط ... دخلت اصلي معاهم ...
انا عارف ان الازهر بيصلي 22 ركعة يعمي المفروض ان فاضل 11 ركعة ... الجميل اني اول مرة اسمع قراءة غير حفص عن عاصم ... لا ومش ورش بس لكن قرائتين كمان ...
و علي الرغم ان النية كانت واضحة علي ختام القرأن الليلة دي لكن واحد ربنا يكرمه راح لحد الامام وبيسأل هو فاضل اد ايه ... واضح انه متعود علي التراويح الثمانية ... للاسف الامام توقف عن نص الجزء التلاتين ... ويمكن اقل من نص الجزء ...
انا روحت البيت و انا حاسس اني طاير ...
لله الحمد من قبل و من بعد
اللهم اتك كريم عفو تحب العفو فأعفو عني ...
موعدنا ليلة 27 رمضان في مسجد عمرو بن العاص خلف الملك المتوج علي عرش الدعاء محمد جبريل ...
اللهم وفقنا وتقبل منا
محمود فاروق