الموضوع سهل و صعب ف نفس الوقت ... بس مش مستحيل
ازاي؟
خلينا مع بعض نمشي خطوة خطوة .
اول خطوة تحديد موضوع البحث .
و بالنسبة لينا عندنا خمس مواد ف كل مادة عشرات المواضيع . و نصيحة خلي موضوع البحث مرتبط قوي بالمادة المقررة عليك علشان حاجتين :
1- ماتتعبش نفسك ف حاجة و ان كانت ح تفيدك بعدين لكنها مش مرتبطة قوي باللي بتدرسه دلوقتي .
دا طبعا اذا كان عندك هدف تاني غير النجاح .
2- الوقت . يعني ح تذاكر في المادة المقررة ليكي و لا ح تدور علي مراجع و تقرا كتب تانية ؟
علي كل حال انت حر .
ز ف اختيار الموضوع ممكن تعمل زيي و تفتح الجرنال و تدور علي اي موضوع الناس مهتم بيه و مرتبط بالدبلوم اللي بندرسه .
عايز امثلة ممكن تبعت ليا رسالة و تحدد ليا الدبلوم بتاعك ايه و ايه المادة اللي انت عايز تكتب فيها و انا اديلك علي الاقل خمسة مواضيع تقدر تكتب ف اي واحد فيها .
من غير حد ما يقول لك انت ناقل من حد او سارق البحث او علي الاقل الظروف ... انت مختار عنوان (قد قتل بحثا ... علي دكتورنا العزيز فتحي فكري )
طبعا ح تضمن ان الدكتور اول ما ح يشوف العنوان ح يوافق علي طول مع نظرة اعجاب .
او يبتدي يفكر معاك ف خطة بحث تانية او يعدل ليك البحث بتاعك .
و ف الحالتين انت الكسبان ..
في ناس بتستسهل(او بتستهبل زي ما تحب تسميها سميها ) و تمسك كتاب الدكتور و تختار اي فصل و تبتدي ترقي .
يعني الفصل يبقي باب و المبحث يبقي فصل و تنقل زي ما هو مكتوب و تروح تديه للدكتور .
و في ناس ذكية شوية بتختار موضوع و تروح تنقله من كتاب دكتور تاني
بصراحة الكل بيعمل كده ... بس تفتكر ان الدكتور مش ح يعرف ؟
بمعني لمل سيادتك تقف قدامه و يقول لك انت ناقل منين و تقعد تحلف مهما تحلف قدامه انك قريت و كتبت مش نقلت و كتبت (لاحظ ان في اختلاف كبير و ح اوضحه ليك لما نتكلم عن المراجع )
طبعا منظرك قدام مصر و التاريخ مش ح يكون كويس .
لكن احيانا ... بتعدي .. بس انا مانصحكش بكده .. يعني انت نا تعرفنيش
بس الاهم ما تروحش لدكتور بعنوان و خطة بحث مش من اختصاصه ..
ساعتها انا اللي ماعرفكش .
الخطوة التانية و اللي لازم تاخدها ف اعتبارك برضه ف اختيار عنوان البحث او الموضوع عمل خطة البحث .
يعني ايه ؟
باختصار شديد جدا لو فاكر عناصر الاجابة عن اي سؤال ف امتحانات الليسانس كانت عبارة عن مقدمة و عناصر السؤال و الخاتمة .
نفس الشئ ف خطة البحث .
مقدمة : و هي طبعا استهلالية او تمهيد للموضوع .
ممكن تكون سبب اختيارك للموضوع و ممكن تكون نتيجة عايز او وصلت ليها بالفعل و ممكن تكون مشكلة عايزة حل .
دا بالنسبة للكليات العملية .
و لو انت مقتنع زيي بأن كلية الحقوق خليط او مزدوجة بمعني انها عملية و نظرية كمان (عشان مش شرط ان الكملية العملية هي اللي فيها معامل و بس لكن المهم الجانب التطبيقي )المهم اقول لك ان المقدمة ممكن تكون كمان جزء من البحث نفسه بمعني تكون عرض للبحث . يعني ملخص للبحث .
علشان كده في ناس بيكتبوها ف اخر حاجة .
و دول الناس الناصحة او المحترفين .
نخش بقي علي خطة البحث
و هي تقسيمك للموضوع
او العناصر اللي كطنا بنجاوب من خلالها علي اسئلة الليسانس.
بس طبعا بتوسع شوية .
بحث بقي .
و التقسيم ده بيبتدي من ابواب – فصول – مباحث - مطالب- فروع- اغصان ... لحد ما تزهق.
او لخصها ب باب – فصل – مبحث .
اديك مثال ؟
تعريف القاعدة القانونية هي قاعدة عامة مجردة مصحوبة بجزاء تنظم السلوك الاجتماعي .(اعذرني لو مش مذاكرها كويس )و عايزين نعمل بحث ف الموضوع ده .
تعريف القاعدة القانونية .
اولا : المقدمة ح تكون ف اهمية القاعدة القانونية
اتكلم براحتك بقي .
ثانيا خطة البحث ح تكون تقسيم التعريف ده و هم العناصر الاتية :
قاعدة اجتماعية
خاصية العمومية
خاصية التجريد
خاصية الجزاء
و ده فصول الاجابة
بمعني كل خاصية من دي ح تتحط ف فصل
اما التفريعات التاني زي مثلا تعريف الجزاء و صوره فده ح يكون مباحث الاجابة و لو احتاجت لتفريعات تانية اديها بقي زي ما قولت لك فوق .
طيب دا المثال لموضوع صغير قوي ... المواضيع الكبيرة بقي ح نعمل فيها ايه؟
الفكرة ف البحث انك تحيط علما بموضوع البحث ... يعني تكتب كل شئ متعلق بيه
و الصح تقسم الباب الاول للتعريفات او المبادئ او النصوص الدستورية .
و ده تقسيمي المفضل و ممكن اقول بأطمئنان انه تقسيم احترافي .
و الباب الاول لو حبيت تقسمه تبتدي م الاطار الكبير للاطار الصغير .
اديك مثال .
حقوق الانسان
الباب الاول هنا ح يكون النصوص
فصل اول : الدين
فصل ثان : الاتفاقيات الدولية
فصل ثالث : الدستور
الباب الثاني بقي ح يكون التطبيق العملي للحقوق دي او الموضوع اللي انت عايز تعمله .
و برضه ح يكون ف العالم كله ثم في الدول العربية ثم في مصر
كده عندك 3 فصول .
عرفت بقي ان تحديد الموضوع نفسه هو اهم شئ؟
لان الموضوع هو اللي ح يفرض عليك الخطة و ان كاتنت تستاهل التقسيم ده او لا .
في مواضيع ممكن تكتبها ف عشر ورقات و في مواضيع عايزة علي الاقل خمسين صفحة .
الخاتمة
و دي نهاية البحث ... يعني تكتب التوصيات او النتائج او الاسباب او حتي تحية للاهل و الاقارب .
زي ما تحب
المراجع
و هي دي اللي بتكشف يا معلم
لانك المفروض تكتب اسماء الكتب او الدوريات اللي استعنت بيها و تكتب الصفحات اللي قريتها و استفدت منها و نسختها كمان ف كتابة البحث ( نصيحة اكتب بصدق لان الدكاترة تقريبا حافظين اللي بيتكتب ف الكتب التانية ...)
و انك تكتب البحث من كتب متعددة ما فيش ليك و لا حتي سطر واحد تعبان في و تذكر ده بأمانة وشرف و احسن من انك تنسب مجهود غيرك لنفسك و تنكشف .
الفهرس
و ده ممكن تعمله من خطة البحث نفسها ... يعني تحديد الصفحة و كتابتها قدام العنوان .
احنا كده خلصنا ووصلنا بقي لطريقة الكتابة .
حددت العنوان ؟
تقدر تكمل معايا ...
ماحددتش يبقي كفاية عليك كده و اعتبر اني خلصت معاك .
نكمل بقي مع الناس اللي حددت الموضوع و عرفت ح تكتب ف ايه .
سيادتك ح تطلع علي المكتبة ..
ماعلش ماينفعش المكتبة هي اللي تجيلك ... و ان كان النت بيسهل قوي لو انت عايز تعمل اي حاجة و خلاص بس ما اضمنش ليك رد فعل الدكتور ايه .
خلينا ف الاسلوب التقليدي و بعدين حابقي اقولك ازاي تستخدم الانترنت و اي هي المواقع القانونية العربية اللي ممكن تفيدك .
المهم ... ح تطلع عالمكتبة و مافيش معاك غير عنوان بحث .
طبعا الورق و الاقلام عليك
تروح بقي و تشوف القسم اللي موجود في الموضوع ده و تطلع الكتب اللي بتتكلم عنه ...
ماتخافش انت مش ح تقراها كلها ... انت بتطلع بس الجزئية اللي بتتكلم عن موضوعك انت .
و طبعا كل ما اخترت موضوع سهل ح تلاقي الجزئية المطلوب منك قرايتها صغيرة .
تحدد بقي الصفحات اللي انت عايزها و تنقلها او تروح تصورها(سعر الورقة 15 قرش) ما ينفعش تخرج بالكتاب بره المكتبة .
يعني اعمل حسابك تروح بدري شوية قبل المكتبة ما تقفل .
و عندك مكتنبة نقابة المحامين الفرعية فالجيزة او الرئيسية في الاسعاف (رمسيس).
و لو عايز مكتبات تانية فيها كتب قانونية شبه متخصصة زي الللي عندنا ف مكتبة الدراسات العليا عندك مكتبة مبارك العامة فرع الجيزة او الزيتون
و عندك مكتبة القاهرة الكبري في الزمالك-ش محمد مظهر.
و علي فكرة انا قابلت ناس كانوا بختاروا موسوعات او مواضيع تتناقش ف كتب .
ياريت لو انت ناوي علي كده تأجل ده للماجستير او الدكتوراة .و معاك ربنا .
كتبنا البحث بقي و الحمد لله ...
كده معاك العنوان و الخطة و صفحات الكتب او المراجع .
دلوقتي بقي اطلع ع الدكتور و خليه يمضي الخطة .و انت و حظك ... يا يمضي يا يرفض و تضطر تعيد م الاول .
كده خلاص
ماعندكش اي صعوبة دلوقتي ف كتابة البحث .قولت ليك كل الخطوات و لو مافهمتش بعد كل ده ...اديني العنوان و انا اكتبه ليك و كله بحسابه .!!
اي خدمة
.محمود فاروق
www.policy122.blogspot.com
www.policy1.jeeran.com
policy122@yahoo.com
