طقس اسود

بافتح سنة باب بكرة ...و أتأمله ...
و أرجع بضهري واحدة واحدة كل طريقي لأوله.
و أنهش ف قلبي لحد صورتك ما تتمحي
و لما ح أقدر علي الاشتياق
علي طعم اجمل حب بحلاوته فاق
ح اقدر اقول لك دلوقتي بس ... افرحي...
سحرك خلاص مالهوش أثر
ومافيش شجر
و لا حتي اتنين لمون يجمعني بيكي.
افرحي
ماهو اللي زيك بيبني ثقته من ضعف الي زيي
و يطفي ضيي
يطفي بصة نور تناكف عشان تخلي
لوجودك معني ... لمطرحي.

انت فين

ف الشارع
و الظلم اللي قاسينا منه
صوته العالي لساه طالع
و كترة اتجمع اقوي ما فيها بيبغوا الجنة
و جوة القلب حماس بركان لساه والع
و اتحركت...
عربية م الي الامن سماها مدرعة
متسربعة
تعلن شعار القوة لما تغمي عينها ببردعة
بتدوس و ايه يعني اتفرم تلاتة اربعة
و لحظة سكوت
لما التقيتك بتسيب جواري
و بعد مسكة ايديك ليا اني اثبت
مش احنا اللي نخاف و نجري ف الحواري
و زي تابع مشيت بعيني
و اللي مخليني ...
واقف مكاني ايماني بأن قضية اكبر من كياني...
بتحركك
لكن بقية خوف و نبت جذوره ف القصاري
حبستني ... لكن انت لأ.
من جنبي شفت عينيك بترسم جوة منها
صورة مصر ... بكل العشق
و ماعرفش ايه اترسم بعدها ...
لكن لقيت فارس و عينه بكل الغضب
و بصمته وحده لقيته واقف ... ضد الهرب
ضد اللي جاي بقوته و سكته
لازم تكون طريق و يفتحه جبننا.
لكننا
شفنا شجاعته و هو واقف و أيده
دي بتحضن ف وسطه
و من كسوفنا قصاد شجاعته
عدت ثواني لحد ما انت فهمتنا
الجبن دا مالهوش مكان غير ف قلب عدونا
و ما دام ناوينا ع الميدان
يبقي الميدان صار ملكنا .
واقف ياصاحبي من غير سلاح
غير شجاعتك
اسمح لي اطلب منك سماح
قدام جراءتك
اللي رجع و الي اتوجع و الي كمان
عاش ييجي كام تلاتين سنة خايف جبان
فاق لما شافك جاي زي رسول و شجاعتك ايه
تكتب نهاية ذل و تفتح لمصر طريق البداية
و القوة عرفت انت مين
فرجعت لورا
و الكترة قدرت تستعين
بالمغفرة
ووراك لقيتني من سكات باكمل مسيرتك
وورانا ياما ولاد بنات غنوا بعظمتك
و بعد ما رجعنا قلبي اشتاق يصافحك
لكن البطل جوانا داب و ماشفنهوش
ماهو زيه ياما بيرسمو صورة البطولة من غير رتوش
لا استني حد يقوله شكرا او حتي حد مايعبروش
ركب حصانه و هو عارف سكته من زمان
انا مصري و ادي كرامتي و ادي رسالتي
و بيك عرفنا مين الشجاع و مين الجبان

رحت فين
ايام كتيرة و انا بادور عليك و نفسي
اشوف خيالك و لو ح اشوفك من بعيد
و لقيت ملامك ف الوشوش اللي تنسي
ذل السنين و الانين و التنهيد
اللي زيك م اللب بجد قدر يضحي
هو اللي فرحه كان حقيقي يوم التنحي
هو اللي صوته كان بيعلا وسط الالاف
هواللي زلزل السما بأصدق هتاف
هو اللي لما شاف بلادنا بتتحرق
شمر دراعه و راح يطفي بهدمته
و غيره كان وسط الميدان
زي الديابة
مستني حته م اللي جاي
او صورته واقف ببسمة هبلة قصاد دبابة
او يجري لما يشوف مذيع بيسأل سؤاله
تلقاه بيرغي وولاحد عارف ايه اللي قالو
او حد لما انكسر رتب ف ورقه
ايه يعني حزب
ياعم غار حزبه و حرقه
انا النهاردة اتولدت بثورة يناير
و يحكي دمعه عاللي شافه من ظلم جاير
و غيره ركب دقن و ماتعرفش ليه
غير لما تسمع كلامه و تشوف فعله تقولش ؟ايه؟
من ييجي كام ماخور و جاي يأدن صلاته
و ازاي ح نقدر نلقي نور و ديه صفاته
و الميدان...
الميدان الي كان حلم حقيقي بينده لنا
و ريحة الحق و الكرامة اللي ظهرت وسطنا
بقي بدالها الف شئ كأنه انكتب
اول ما نلقي للطريق بداية و تجمع شملنا
نفقد صقتنا بالصديق ما هو اللي خان كان مننا
و الثورة الي كانت بريق و لا الف ضلمة ف وشنا

انت فين؟
لو مش ح تظهر وسطنا
لو مش ح تسمع همسنا
لو مش ح تيجي تقول معانا
الثورة لسه ملكنا
يبقي خلاص اعلنت انك موّتنا

لكننا
لسه نقطة دم سخنة بتقول لنا
علشان بلدنا كله يهون
و من النهاردة ح افضل ادور مهما يكون
حرام تضيع صورتك هدر
حرام نفكر زي البشر
ح اكمل سيرتك و لو ماشفتش حضرتك
خلاص انا مابقيتش جبان

انت فين (بين قوسين)

انا ف الميدان

جمعة تصحيح المسار ... علي جنب يا اسطي.

كالمعتاد نزلت التحرير لأري بعيني ... ماهولو استنيت قدام التليفزيون مش ح الاقي علاج نافع لحالة الغباء و العته اللي ممكن تحصل ليا ...
خصوصا و زي ما سمعت اهنمام التليفزيون بعيد الفلاح ف استاد القاهرة ... وبجد لو في حاجة من الحاجات اللي تم الاعلان عنها عن تخصيص اراض الاستصلاح لفلاحين ح يزرعوها بجد يبقي انا موافق و مؤيد لعيد الفلاح ... و عايزه كل يوم ...
لكن لو ما كنش ... يبقي اسمحلي...

جمعة تصحيح المسار ...
اسم جميل ومعبر كعادة من يختار اسماء المليونيات ...
الصينية ح تفضي من عساكر الشرطة و البياعين السريحة ح ييجوا مرة تانية و المنصات ح تتملي تاني .
و خطبة الجمعة و حماس الشيخ مظهر .
وتوافد الاعداد من كل جانب لتلتقي في النهاية عند ميدان تحرير مصر .
و الطواف حوالين الصيثنية سبع مرات.
يااه ...
الواحد وحشته الطقوس دي .

رحنا و هتفنا و الحمد لله
الالتراس جم و عوضوا العدد اللي اتراهن انه ح يتعد علي صوابع الايدين
و الناس جات و لا كأن في توجيه سياسي اعلامي زراعي بعدم النزول .
و الساعة بقت عصاري و ابتدي الناس تمشي .
لا مش تروح بيوتها ...
تروح سفارة اسرائيل .
طيب انا عندي ميعاد يا اخوانا قد يتوقف عليه مستقبلي ...
طيب و مستقبل مصر؟
طيب عشان مستقبل مصرياضيع مستقبلي انا بقي ؟
وهوانت احسن م اللي ضاعوا
ايه يا عم انت صدقت ؟
طيبب اوصلكوا في سكتي وارجع ليكوا تاني .
طيب ما تتأخرش
و هو انا اقدر؟
طبعا انا كنت باكلم نفسي ...
دقيقة و كنت ف المترو علي مشاوار مهم جدا بالنسبة لي
واستغليت ان في شوية خدوا بعضهم و جريوا كأن في حد بيجري وراهم بمنتهي (الشجاعة الثورية)
عادي يعني.
والمهم طلع مافيش حاجة و دول شوية عيال بيهزروا .
الهزار دا قلب كام نصبة كشري علي تكسير كوبايات شاي ....
ركبت المترو ورحت وبسرعة خلصت ميعادي ...
و طبعا سعادتي باليوم اللي عدا من غير لجان تفتيش و لا تأمين للميدان و رغم كده ماحصلش اي حاجة وحشة
يعني المليونية دي نجحت و بأمتياز من ناحية الحشد
ناقص بقي المجلس و الحكومة ينفذوا كالمعتاد بعد كل مليونية.

رجعت الاول التحرير عشان اشوف هل في حد ح يعتصم ولا لأ.
مش باين
علي كوبري الجامعة حيث استرجعت كافة الاستعدادات لتحطيم الجدار العازل...والتي تتلخص في مجرد حملك لاي شاكوش يفي بالغرض.
طبعا اللفة المعتادة بتاعتي علشان اقدر اكون صورة للموقفمن كل جوانبه.
لما رحت كان التكسير لسه شغال .
و المشهد الغريب شويتين .
قوات الامن تتمركز عندشارع هارون (قدام حديقة الاورمان بس من ورا مديرية امن الجيزة)
و قدام المديرية اعداد كتير من الشباب المفترشين للارض
بعدها تجمعات اكتر تحت السفارة
عند كوبري الجامعة الاحتفال الكبير.
الجدار تقريبا اتهد لكن في ناس عايزاه يكون بمحاذاة الارض.
الالتراس – اللي وجشوني بجد من ايام 28 يناير – بيغنوا بمنتهي الحماس .
و (منتهي الادب)
طبعا اللي راح الاستاد ح يفهم قصدي وكفاية كده عشان معانا بنات
مش دا موضوعنا .
موضوعنا ان الالتراس من وجهة نظري هم المخالب القوية للثورة .
من اول ما مظاهرات 25 يناير و لحد دلوقتي .
و عشان كده لما باشوفهم باحس باطمئنان .
ازاي ؟
ح اقولك .
يمكن تكون زي حالاتي مش موافق علي عدم وجود اي اعتبارات اخلاقية في هتافاتهم اللي ممكن تخدش الحياء ... لكن اكيد ح تحترم فيهم عدم خدشهم و لو سنتيمتر من اي ممتلكات خاصة او عامة .
و اشهد بنفسي علي انهم بيحاوطوا اي مكان ممكن حد يقرب له وقت المظاهرة لحد ما المظاهرة تعدي .
تأمين يعني .
اكيد ح تحترم فيهم خبرتهم الطويلة في التعامل مع قوات الامن المركزي و اي شغل بلطجة .
علي عكس كتير قوي بنوا خبرتهم بس من الرد علي استجوابات مباحث امن الدولة وهي مغطية عنيهم .
اكيد حتنبهر باسلوب الكر و الفر بتاعهم وازاي بيستفزوا اي قوة و ازاي بيتم احتواء القوة دي .
اكيد ح تفتكر احداث ماتش الاهلي و كيما و تنتظر منهم الرد علي تجاوزات الشرطة ضدهم و لو ماكنتش موجود هناك زي حالاتي اوزن كلام دول و كلام دول و اعقلها و خد قرارك .
هما مش ح يديلوك حاجة لو حبيتهم ... و لو ما حبتهمش مش حيكفروك و لا حيسحلوك او حتي يهتمةوا بالرد عليك .
عندهم ما هو اهم

عشان كده انا باحترم الالتراس.

فجأة السما ابتدت تمطر ورق ابيض من الاوراق المستعملة في التصوير ؟
ازاي و ايه الي حصل...
ابتديت اسأل ...
هو في ايه بالظبط؟
عملتوا ايه من ورايا يا ثوار؟
سمعت كام كلمة ورا بعض

اشتباكات

اقتحام للسفارة

الاستيلاء علي ارشيف السفارة و بعزقته ف الشارع .

طبعا اهتمامي اني اعرف ايه محتوي ارشيف السفارة و ايه هي الاسرار العليا اللي ح تنبان وتتفضح .
اجدد ورقة قريتها كانت في 2007 و كانت عبارة عن صورة لاخبار منشورة في الجرايد .
حاجة عادية بالنسبة لاي شغل مخابراتي هو تجميع المعلومات وتصنيفها و الخروج فيما بعد من كم المعلومات المنشورة رسميا و عبر كافة وسائل الاعلام الي معلومات جديدة مستنبطة و لكن غير منشورة .
و اوراق ادارية عادية جدا من نوعية طلب السماح من وزارة الخارجية المصرية باعطاء تصاريح حمل سلاح لطاقم امن السفارة
و ايصالات موبايل و تليفونات
واحد من المتحمسين لما شاف اسم موبينيل علي فاتورة قعد يزعق ...
شوفتوا ... اهو ساويرس بيتعامل مع اليهود
الرد جاله ف ساعتها :
امال عايزهم يتكلموا اقمار صناعية ...
ماهم 3 شركات محمول بس
يعني يا دي يا دي
الاخ سكت و اختفي من قدامي .
محاولات التقاط الورق المتطاير بشكل هيستيري يخليك تسأل نفسك هو الورق دا مهم بجد ؟
او هم الشباب دول متوقعين يلاقوا ايه ؟
اسماء جواسيس مثلا؟
و حيلاقوه بالسهولة دي؟
المهم
كل شوبة يترمي دفعة من الاوراق لدرجة خلتني اتريق واقول هم بيصوروهم دلوقتي و مستنين المكنة تطلع قماش ؟

شويتين و لقيت مجموعة بتجري ووراها ح تلاقي الف واحد وراهم
بس مش زي اللي حصل ف التحرير .
المرة دي بيقولوا انهم مسكوا كام واحد معاه سنجة و ماعرفش ايه.
سبت دا كله خصوصا ان الساعة بقت اتناشر و نص
و انا مشكلتي اني مش باكتب بالتفصيل الممل رغم اني كاتب قصة لكن عايز الحق اكتب اللي بافتكره اول باول.
سمعت طلقات رصاص ف الهوي و ابتديت اشم ريحة ادمنتها .
ياااه
انتا فين يا رااااجل

قنابل

غازات

مسيلة

للدموع

انا تقريبا باحس بيها من تدميع عيني قبل حتي ما اقرب منها .(دموع الفرحة طبعا)
طيب انا دلوقتي عند مسلة جامعة القاهرة
ارجع و لا اكمل و اركب للجيزة و اروح.
طيب هما لو عايزين يمشوهم من هناك ح يعملوا ايه؟
ماتنساش دي اتسجلت واقعة اقتحام سفارة برضه ..ز
و لو عايز او مش عايز نذيع فإحنا ح نزيع...
دماغي ماجابتش ساعتها اكتر من كده ...
ولان في ناس كانت بتمشي و الحمد لله كفاية و خلاص علي كده
فايه اللي ح يخليني اقعد
اوحتي ارجع و اشوف فيه ايه ؟
خدت القرار التاني لان الصوت سكت و كمان لاني تعبت من احداث اليوم دا .
لكل بشر طاقة
وصلت الجيزة و علي مقربة من مستشفي ام المصريين لقيت عربيات الاسعاف رايحة جاية بشكل متتابع .
اول ما وصلت البيت فتحت علي القناة الاولي
لقيت المذيع يا عين امه بيتشحتف و بيعيط كأن اسرائيل دي تبقي بنت خالته .
و لقيت صور عربيات امن مركزي مولعة
دا كان فين دا؟
بيقول ورا السفارة يعني ف شارع جانبي
وهو انا كمان مطلوب مني تغطية الشوارع الجانبية؟
دكتور من اكاديمية ناصر العسكرية اسمه محمود خلف بيتكلم وحش جدا عن المتظاهرين وعن الالتراس
من حقه طبعا بس يا دكتور اسمحلي هو الحساب بيكون علي الفعل الاساسي و لا علي رد الفعل؟
ايه اللي يغصب او يجبر الناس تنزل مظاهرة تصححي المسار من الاساس الا لو كانوا شايفين ان مافيش حاجة بتحقق؟
و ان اكذوبة عجلة الانتاج و الاستقرار دي بقت خدعة ماتليقش علي عيل صغير .
و ان الاسلوب الغير متربي في التعامل مع الشرطة مش سببه ابدا ان الظابط بيتعلم في الكلية انه اله و علي الشعب السجود ليه ...
و بالتالي اللي يجيله مزاج من الظباط و يحب يضرب اي مواطن خاصة الغير مسندودين منخم علي خده الايمن قوام يشلح له قفاه عشان البيه الظابط يتكيف.
يا دكتوزر لازم حضرتك تنزل الشارع و تشوف كم الجرايم اللي بتحصل قدام الظباط و ازاي سيادتهم بيتعاملوا بمنتهي اللامبالاة و لا كأنها شغلتهم اللي الشعب اللي عايزين يذلوه هو الي بيدفع ليهم مرتباتهم .
لازم يفهموا ان الناس مش ممكن تقبل ذل و اللي مش عاجبه مبدأ الاحترام المتبادل بين الشعب و الشرطة يتحمل تبعة دا .
و افتكر بعد الانسحاب الكبير و الظباط اللي كانوا قاعدين ف البيوت مستخبين تحت الكنبة و قيام الناس ساعتها بتشكيل لجان شعبية بديلة عن الشرطة اكابة صغيرة قوي عن مين مهم لمين .
يا دكتور صدقني انا مش عارف اجاتوب علي سؤال محير بالي
لو ظابط تعدي حدوده معايا او مع اي حد لاي سبب مش قانوني انا ممكن اعمل فيه ايه .
للاسف يا فندم انتو اللي ضيعتوا هيبة البدلة
مش الناس
و ياريت حضرتك تراجع تاني اساسيات العلاقة بين الشرطة و الشعب اللي بيتعم تعليمها للظباط و بعدها تلوم الي نفسك تلومه ليه الشعب بيعامل الشرطة او الامن المركزي بالشكل دا .
فين الفعل ... و فين رد الفعل
بعدها طبعا كلام من نفس نوعية النداءات بتاعة كرات اللهب المتجهة لميدان التحرير.
الغريب اني افتكرت وقتها بس اني بادرس قانون دولي و ان اللي حصل دا اسمه اقتحام سفارة دولة اجنبية و دا معناه كبير جدا دلوماسيا .
لان كل دولة ليها حق حصانة علي اوراقها و ارشيفها الدبلوماسي.
ايوة اللي قعد يتبعتر ف الارض دا .
لكنها مش المرة الاولي علي كل حال
حصل قبل كده كتير ابرزها لما الثورة الايرانية قامت اقتحموا السفارة الامريكية و الورق بتاع السفارة بقي فارش طهران .
و من هنا اؤكد للاخوة الاسرائيليون الاشقاء ان جميع مستنداتهم لن تلبقي في النيل ...
و لن تحرق

لكن ممكن يتوزعوا علي بتوع البطاطا .

تصبحوا علي خير

تاني يوم – صباح السبت - مافيش ولا عربية ميكروباص عايزة تروح ميدان الجيزة .
ليه ؟
في مظاهرات وتكسير للعربيات هناك
اتصرفت و قدرت اوصل ميدان الجيزة
دوب و قزاز متكسر
بصراحة الشوارع فاضية .
لكن عند الميدان واحد واقف و بيقول ان عدد اللي ماتوا من 3 الي 7 و المصابين كتير عدوا الالف...
لقيت كلامه فيه مبالغة
و بصراحة انا مابقتش مصدق حد
و لا عارف من اللي باشوفه اللي حصل دا صح و لا غلط
لكن السؤال اللي عايز حد يجاوبني عليه
ح اوافق ان اللي حصل دا غلط
فسؤال:
لو كانت الثورة حققت اهدافها المشروعة بهدوء و بحضارية زي ما بدأت ... تفتكروا كانت الامور ح توصل لحد كده؟
و مين المتسبب الحقيقي في كل دا
طيب تفتكروا لو ثورتنا كانت زي ثورة ليبيا و قتل و سحل و اغتصاب و بلاوي زرقة
تفتكروا كان دا ح يبقي احسن؟
احسن من حالة الهدوء و اللامبالاة و توزيع التورتة زي ما بيحلا لناس كتير قوي ترديد الكلام دون فهم لمعناه.
الناس عايزه تفهم ...
و انا من الناس دي .
لا باحرض و لا باشتم و لا عايز نقطع ف بعض
انا بابقي شايف واحد من الحزب الوطني و بابقي عارف كويس جدا انه من الفلول و مني عينه نولع قدامه بجازعشان النعيم الي كان عايش فيه ايام مبارك و اسمعه و هو يا عيني بيتشحتف علي الثورة و جمالها .
و علي الرغم من دا باقول سيبه يمكن عايز يطهر نفسخ .
و من كان منكم بلا خطيئة فليلقه بحجر.
لكن بجد مش عارف ...
حد يفهمني !!!
ارتفاع اعداد المصابين ده جه ازاي
و بقي متزايد بشكل اشبه بالمنظم
100 200 300 400

رسالة دي و لا ايه؟
ورسالة لمين

تشوية سمعة الثوار من ايام عجلة الانتاج اللي مش باين لها حاجة و الاستقرار ... دلوقتي بقوا بلطجية ومش متربيين و عايزين حد يلممهم
و الاغرب الاقي اللي بيطالب باعدامهم حفاظا علي العلاقات الدبلوماسية مع اسرائيل الشقيقة .

حجة التدخل الاجنبي وان فيه مصلحة خارجية تلاقت مع مصلحة داخلية لنشر فكرة الفوضي.

طيب بلاش الاجنبي ...

بس انتو يا مجلس يا عسكري مش عارف مين له المصلحة في الفوضي؟

يعني بجد سيادتك مش عارفهم؟

طيبلو عارفهم ساكت عليهم ليه؟

متفق معاهم ولا شايف انهم علي حق؟

طيب لو كنتوا عارفين ان فيه ضرب ح يحصل و اعتداءات علي مصالح حيوية ...
ما تحركتوش ليه؟


ولناس اللي كانت يتضرب ف اهالي الشهداء قدام المحكمة ...
و البلطجية الي خرجوا من ورا الامن المركزي في العباسية.
و الانفلات الامني الي زاد في وجود الشرطة عن وقت غيابها.

لو مجرد طرحي لكل الاسئلة دي يبقي خيانة لمصر انا مستعد اتحاكم وعسكريا كمان .

لكن اللي انا واثق فيه اني مهما كانت ثقتي و احترامي و امتناني للمجلس العسكري كبيرة ....
لكن اكيدفي غيري نقصت عنده قوي الثقة دي .
و اللي حصل عند مديرية امن الجيزة يشهد علي اللي باقوله ...

و رد تركيا علي اسرائيل في الوقت اللي الناس قارنت ردنا احنا بيه خلا الثقة دي بتقل

ذنب مين بقي؟

لازم يكون فيه موقف صح

تخوين المظاهرات وتشويه سمعتها مش هو الصح... بالعكس ...ممكن يؤدي لنتائج اعنف و شد سوءا .

ثروات مصر الي اتهربت برة ح ترجع امتي ؟
والمجرمين اللي طلعوا بيها او طلعهوها برة ح ياخدوا حسابهم امتي .
و ليه ماي تتحاكموش علي جرايمهم التانية محاكمة عسكرية .
و لا دي برده خايفين من عدم اعتراف اوروبا بالمحاكمات العسكرية خوفا من عدم رد المليارات .

ومبارك اللي لواختلفنا علي انه مجرم مش ح نختلف علي انه متهم...
دي معاملة تليق بمتهم؟!
هو دا العدل؟

السلع اللي بتختفي و تظهر علي ايد ناس معينين و ف وقت معين
كل دا الغرض منه ايه؟

الناس اللي بتطالب بحقوقها ومافيش حد بيعبرها او يسأل فيها ...
ولا لازم يكون دايما في اعتصام عشان المسؤلين يحسوا بالناس ؟

لازم يكون في استجابة للناس .... الناس اللي مطالبها دايما مشروعة ....
الناس اللي ماعندهاش فكرة الصفقات و المصالح ...
الناس اللي بجدح تفضل في الاخر
وكل دول ح ينساهم التاريخ .

ربنا معاكي يا مصر
و معايا انا كمان عشان افهم كل الي بيحصل دا ...
ملحوظة :
اثناء ثورة يناير كانت بتيجي وشئوش لذيذة قوي تحذر من الاجندات الخارجية و وجبات الكنتاكي ...و طبعا الشباب المغيب المخدوع و اللي مش عارف مصلحة البلد الي بتضيع ياوديع .
و طبعا كلنا فاكرين تامر غمرة و البنت الي طلعت مع هناء السمري و سيد علي ...
مش عارف ليه اليومين الي فاتوا دول افتكرتهم قوي ...
تفتكروا معني كده اانا ممكن نشوف قريب خطاب التنحي؟

عودة جديدة

dhhhi


ياااه

الواحد كان حاسس انه مسروق يا جدعان

عفوا ... لفترة طويلة توقفت عن التدوين بسبب ضياع الباسوورد

و الحمد لله عدنا ...

لذا اعتذر .. دا لو كان في حد متابع ...
عن تأخر نشر بعض المقالات عن موعدها

شكرا

و الحمد لله