هما عايزين منا ايه

لا بجد هم عايزين منا ايه؟
تعليم و اتنيلنا اتعلمنا كل جهل و الحمد لله خدنا شهادات جامعية تثبت جهلنا .
شوية الانجليزي اللي قعدنا ندرسه ف تسع سنين يخلوا الحمار و لامؤاخذه ينهق بالانجليزي طلعوا علي مافيش . الواحد مايعرفش يركب جملة صح و لو قدر مش ح يعرف ينطقها .
كلمة صفحة بالانجليزي تكتب page و النطق بقي انتي و حظك ....طول دراستي و الله اتعلمتها "بيج " زي نطق اللون البيج بالضبط . فين و فين لما عرفت ان نطقها الصح كان "بيدج"لان حرف ال gبينطق dg.
و طبعا اكتشفت لما خلصت تعليم و جيش ان الشركات اللي باقدم فيها و اقول اني ممتاز في الانجليزية طبقا لدرجاتي في الثانوية العامة اني و بمنتهي البساطة في نظر صاحب الشركة اللي قاعد يسمع مني و بيبتسم علي مقدار الاخطاء اللي بتتقال مش اكتر من كداب كبير .
و بالطبع الرد النهائي اتفضل دلوقتي و ح نبقي نتصل بيك .
و طبعا مع تكرار الامور عرفت سر الشفرة دي., معناها اتفضل و انسي انك قرفتنا .... اقصد شرفتنا بمقابلتك .
و طبعا ح تاخد كورسات في الانجليزي و الكمبيوتر وتاخد الي سي دي ال و الكيو اف يع و الشي حا يس و غيرها من الشهادات الي ح تركنها زي اخواتها.
و مع طول الوقت اللي سيادتك مبلط فيه ف البيت ح توافق علي نسيان شهادتك و انك مؤهل عالي و ان مامتك لسه بتجيب لك الفطور لحد السرير. اول ما تخرجت و احلامها الوردية اللي ح تعوض تعبها هي و والدك في تربية سيادتك .
و طبعا قيمة اختك اللي بتساعد مامتها في شغل البيت ح تكون احسن منك ياللي مش عارف حتي تنقي الرز.
و مع مرور الوقت طبعا ح تسمع كلام لو سمعوا الهرم يندك و يبقي تراب .
ح تروح ماسك الوسيط بتاع يوم الجمعة مع جرنان الاهرام و تدور . تكتشف انك مالكش لازمة لا في البيت و لا براه .
ماحدش عايز شهادتك .
امال كنت بتتعم ليه؟
"تيييييييييييييييييييييت "
مندوب مبيعات من بتوع الشركة النهاردة عملة عرض نحب سيادتك تستفيد بيه
مندوب سياحي "تايم شير" من بتوع بمناسبة احتفال الشركة بعيد ميلادها جايبين لحضرتك عرض خاص بس الاول انت دخلك كام .
كاشيرو دي ماشتغلتهاش بس اصحابي بيقولوا انها متعبة شوية .
فرد امن من بتوع 200جنيه تتخصم منها 30 ماعرفش عشان ايه و ماحاولش صاحبي اللي اشتغل في الامن يعرف ليه و لا اساسا الشركة بتتحاسب عن كل فرد بكام و ترميلهم كام .
بس ربنا ح يوفقك .في الحسنات ... الشحاتة او التسول باسم مودرن شوية .بس في الاخر شحاتة .
و ماحدش يزعل ... علي رأي الفيلم ... "هي ماشية غير بالشحاتة" .
و طبعا انسي كلام بتوع التنمية البشرية اللي بيقولك حاجتين متناقضتين .
الاولي ان السي في بتاع سيادتك لازم يكون مليان مهن مرموقة .
بعد كام سنة سيادتك ح تروح تشتغل ف بانك او شركة و اول ما تكتب انك كنت شغال "تييييت " ح تلاقي الرد السابق ذكره "
و التانية انك تشتغل اي حاجة زي ما عمل مدير اكبر شركة ف كوالالمبور اللي بدأ من الصفر و بعدين بقي ملياردير .
الغريب ان ده ممكن في اي دولة غير مصر .
و لو حصل ف مصر يبقي مش اليومين دول .
"اصل الامل كان كبير قوي لما حفيد السيد الرئيس يمسك الحكم ... بس الله يرحمه بقي "
و طبعا سيادتك نفسك تتجوز ..:. انسي ... ماعندكش شغل ملائم – ده لو لقيت اساسا بنت مستعدة تنتظرك و تعيش معاك قصة حب اسطورية .
لكن اتطمن .... لقد خلق الله البنات اغبياء ليحبوننا ... علشان تعيش ف الوهم شوية و بعدين هما عارفين اخرتها ... عريس خليجي او صنايعي ماليان فلوس ياخد اعظمها دكتورة .
و ماتقعدش تعيط ساعتها و تقول عليها خاينة ...
اصلك "تييييت "

الغريب ان عندنا ماشاء الله اكبر شيوخ و اطول دقون ....لكني بالاقي ان الحرام اسهل بكتير من الحلال ...
ح تلاقي بنت و تلعب عليها شوية و تاخد كل اللي انتي عايزة منها بكلمتين و بعدين ترميها زي اي منديل ورق تم استعماله .
انما لما تقول لها انك عايز ترتبط بيها و تتجوزها تلاقي عنيها بقت الوان و لو وافقت ياويلك من ابوها اللي ح يتفنن في تعجيزك و احتمال يطلب منك كل قرش دفعه ف تربية بنته لحد ما جيت سيادتك و اتقدمت ليها .
مش باقول لك الحرام اسهل .
وطبعا الشيوخ اللي قاعدين يربوا ف دقونهم مش مهم عندهم الحاجات التافهة دي ...
المهم عند جلالتهم لما تخش الحمام ح تخش باي رجل و لما تغسل وشك في الوضوء توصل المياه لودنك .... و كلامهم في السياسة لا يخرج عن ان طاعة ولي الامر واجبة حتي لو كان فاسد - حد يفتكر مقولة" لقومناك بسيوفنا " اعتقد انهم مش معترفين بيها - .و بالنسبة للعلوم فهي لهو عن ذكر الله و يكفينا الغرب الكافر الذي يعمل بدلا منا .لهم النار مهما احسنوا و لنا الجنة مهما كان اثمنا.
الغريب اكتر حالة النفاق و الرشوة الي بقت سايدة التعاملات ... مافيش ولا واحد هز دقنة و قال انها حرام ...
افتكر ان الفتوي الوحيدة بتحريم السجاير ادت بصاحبة الي الاقالة ... بس مش متأكد من المعلومة دي .
اصل الجرنان اللي خدت منه المعلومة و اللي كنت باحترمه جدا و حاسس اني اتربيت علي مقالاته .... اكتشفت انه منافق و متواطئ و كل يوم علي لون .
مرة يقولك دي جرايد صفرا و مرة يقولك دي حمرا و مرة يقولك دي بمبة مسخسخ.
طبيعي ماهي الصحافة برضة بقت "تييييييييييت"
و التليفزيون المفروض انه يثقف و يعلم الناس مش لاقي غير اشاعة الفجور و قلة الادب و نزع برقع الحياء و عمل كل ما يمكن من اجل ان يكون "تييييييييييييييتت"
"مش ملاحظ ان المقال بقي كله تييت "؟
تفتح جرنان تلاقي الدنيا وردي
ترميه تلاقي حاجات منيلة بنيلة .
عيش "تييييييت"... مية "تييييت"... مواصلات "تيييييييت".... شغل " تيييييييت " ...فساد "تييييييييييييييييييييت"....عيشة م الاخر"تييييييييييييييييييييييييييييييييييت" .
يبقي عايزين منك ايه؟
لما البلد تكون كلها ف ايد اللي ماسكين كراسي ح تروح معاهم القبر ... يبقي الشباب ح يبص علي الكراسي دي امتي ؟
و لا احنا اخرنا علشان نكون شباب البلد الناضج الظهور ف برنامج " حالة حوار"؟
ايه اخرة دا كله .... عايزين منا ايه ... اكتئاب و احباط و لا مبالاة و جرايم تحرش و اغتصاب و فساد و واسطة و رشوة و تطرف و ارهاب ...ناس بتبيع ولادها و ناس يتفجر نفسها في ميدان عام .
ناس بتموت من العيا علشان مش لاقيه علاج و لا حق الدوا و ناس تانية لوعطست بتسافر بره تتعالج علي حساب الدولة .
ناس بتعمل اضرابات من الظلم اللي حاسة بيه ومافيش حد بيسأل فيهم ناس تانية بتفوز في مسابقات تافهة و تلاقي صورها و كل حاجة عنها ف وسائل الاعلام .
ناس بتشيل جرايم عن الكبار و مش مهم مصطلحات دقة قديمة زي العدالة و المساواة.و ناس تانية مالهاش اي ذنب في الحياة غير انها فقيرة بتدفع تمن ده اهانة و تعذيب ف اقسام البوليس اللي ما يقدرش يفتح بقه قصاد كلمة واحدة فوق اي قانون
-:"انت عارف انا ابن مين "

عايزين منا ايه تاني؟
للدرجة دي ماحدش منهم شايف البلد رايحة علي فين ... ولا هي لسة ح تروح ... ماخلاص!!
ساعات باحس ان بلدنا محتلة و ان المستعمر الشرير بيطلع عنينا كنوع من انواع التعذيب .
و بيتفنن في اذلالنا و تلوين الدنيا بالسواد ف عنينا .
و مش كفاية عنده كل ده لكن ناوي علي ماهو اكثر .
بس تقريبا انا ماقدرش اقول تييت المرة دي علشان البلد مش سايبة ...
في امن دولة بيلم التيييت اللي ف البلد .
ربنا يكون ف عونهم .

"تييييييييييييييييت"
لا دا من الشعب ليا انا


ملحوظة :
رسالة الي امن الدولة :
كل البيانات المذكورة علي جانب المدونة صحيحة ... مش لازم اساعدكم لو حبيتوا تعتقلوني ؟
امال ابقي مواطن تيييييييت ازاي؟ .