هنا الأدب قلة أدب
هنا الشيطان بياخد دروس
مفروشة تحت رجلينا الكتب
و بألف جزمة عليها بندوس
علي ام مصر التاريخ
و الثقافة و الحضارة
فساد و زاد تلبيخ
ملعون الشرف و الطهارة
الكل اقرع م البطيخ
و الشرف كله لفن الدعارة
عايز تقول طاخ طيخ
خلي سكوتك هو الشطارة
علي أم مصر التاريخ
و أم أبو الهول أبوها
ملعون مافيها تلبيخ
كفاية بقي مر مطوها
و القلب وحده خلاص
لا فيه حيل يفضل يناهد
انعدم مافيكي الناس
ولا نيلك مابقاش شاهد
أمال اشكي لمين
حالي يا ست الكل
و الكل متعذبين
و الحالة ابيض فل
و الامن مستتب
و الفتنة طبعا نايمة
ملعون اللي يصحيها
علي أم الفئة الهايمة
و سؤالي لو حبيتي
تكوني لي ارضي و بيتي
و لو جيتي صرختي ناديتي
عنك أديها طناش
وسؤال لو ارتحتي
كسرتينا و جرحتي
ف قلوبنا ولما استكفيتي
انكفت و لا قمناش
شايفينك بتضيعي منا
ولا إحنا اللي بنضيع
شاغلين بتفاهة عقولنا
كترة فضا ... مقاطيع
لكن بتشتاقي لينا
و بنشتاق إحنا كمان
لكن بنشوف حوالينا
70 مليون سجان
و الحب المتشال ليكي
و الشوق الموصوف بيكي
بيضيع ف سواد عنيكي
و بيملا عيونا سواد
لا ارتحتي و لا ارتحنا
م الخوف واقفين مطرحنا
بايديكي أنتي أتجرحنا
ووقفنا ما أتحر كناش
و لما الموت ييجي منك
إيه اجمل منه موت
والدم بيحضن حضنك
و بيرويكي و فيكي يفوت
علشان انتي تفضلي احسن
تفديكي روحنا و كل الغالي
بنحبك قوي...و أبدا
عن طعم الحب ما ننساش
هنا الأدب قلة أدب
هنا الشيطان بياخد دروس
و لما الفساد وصل الركب
و إيه فايدته غسيل النفوس
مصر يا أم العجب
لساكي اغلي م الفلوس
لكن قلقنا علي انكتب
عليكي تهاني و علينا نلوص
كفاية بقي
ليست هناك تعليقات:
إرسال تعليق
يشرفني قراءة تعليقك ايا كان... فردودك اثبات وجودك