الاثنين 31 يناير
كالمتوقع زارني صديقي الثقيل القولون العصبي بسبب الضغط النفسي اللي شفته طول اليوم ...
و مع حالات الاستيقاظ و النوم كنت باتابع التليفزيون المصري .
و ماشاء الله التوجيه الاعلامي و اللي بيخليك تكره نفسك لو لزم الامر شغال زي الفل .
من اول الاخوان المسلمون اللي قاموا ب السيطرة علي دماغ الشباب و بث الفوضي و ماعرفش ايه كده لحد عمليات السرقة المنظمة للمحال التجارية زي كارفور والمولات .
و الاستغاثة من ناس ماعرفش اتصلت ازاي بالتليفزيون رغم ان مافيش و لا رقم معروض ع الشاشة ...
و الاستغاثات دي زي ما يمكن تتخيل اتخيل
حالة سرقة
هروب مساجين
ماعرفش اقتحام ايه
ماعرفش اعتداء علي ايه
و الغريبة ان كل اللي اتصل كان بيقول كلمة واحدة بس
انا سمعت
او بيقولوا فيه
المرة الوحيدة اللي كان في واحدة بتتكلم عن اطلاق نار بغزارة تحت بيتها حسستني انها بتتكلم من الحمام او تحت السرير او الدولاب
لان مافيش صوت لاي شئ
كمان درجة نقاء صوتها هي تخليني اشك ف انها هي بتتصل منين .
مجموعة فنانين مش عايز افتكر اسمهم كل واحد بيحكي و يشيد بحكمة مبارك و الامن اللي مش ح نقدر نحس بيه من غير مبارك
اتهامات بالعمالة للاخوان ولامريكا ولحماس و لعم عبده بتاع الفول كمان
شتايم لقناة الجزيرةو ازاي هي حطت شاشةكبيرة ف الميدان عشام تنشر احقادها و اكاذيبها وسط الشباب الفاشل اللي ف التحرير .
دماغي ح تنفجر من الصداع اكتر ماهي بسبب الام القولون العصبي
حكايات غريبة عن اللي ف التحرير دلوقتي خلتني باردد طول الوقت كاني مش عارف غير الجملة دي
بطلوا كدب بقي
بطلوا كدب بقي
بطلوا كدب بقي
الاشتراك في:
تعليقات الرسالة (Atom)
ليست هناك تعليقات:
إرسال تعليق
يشرفني قراءة تعليقك ايا كان... فردودك اثبات وجودك