لملم مشاعرك.

لملم مشاعرك...واختفي
ونصيحة اوعي تسيب اثر
نضف حياتك من ذكرياتك
وازرعها علقم تطرح شجر

لملم مشاعرك...ماعدش فاضل ...
ف معني الرومانسي وحضن راجل
غير بس حب وراح بالساهل
ح تقوللي ايه...حكم القدر

كل الكلام سمعته منك
وتدوق الام ترتاح ف حضنك
ودواها لما تنادي اسمك
ودواها معني ماعرفوش بشر

والضحكة لما تقسمها بينكو
واحلام كتير اتشافت بعينكو
ودعوة ف صلاتك الله يعينكو
ويجمع حياتك باجمل قمر

ومابين يومين ...او حتي يوم
او فجأة يمكن تنام تقوم
تسمع وداعها وتعيش ف لوم
حبيتها ليه ...وقلبك حجر

وتلوم ف نفسك والظروف
وتنادي يمكن حواليك تطوف
وف ثانية قلبك يعيش ف خوف
من النهاية...اصله انكسر

وهي عايشة واكيد ف راحة
كان حب غالي ...بس الصراحة
البحر حلو لو كان ملاحة
تقدر تعوم وتشبع سباحة
لكن ح تشرب...ح تروح هدر

والحلوة بحر وتمنها غالي
مش بس روحك...وسهر ليالي
الحلوة عايزاك تقول تعالي
وتجري وراها زي المطر

والحب مهما ح يدي قوة
يخلي النفوس جميلة من جوة
بيعجز يصفي سواد وقسوة
والحلوة قاسية بطبع الغجر

واديك عرفت اصل الحكاية
والقلب داب ومالوش وقاية
الحب اما تعيش معايا
او عيش لوحدك...مش ناقصة مر

محمود فاروق
الاثنين ٢٦ اكتوبر