وف قلبه اصرار غريب
يمحي الجروح من النفوس
وماعادش جنبه حاجة لطبيب
وكمان دواه من غير فلوس
ماشي يوزع سباط بلح
والخير ف ايده مالوهشي حد
بيشيل ويجمع بؤجة فرح
ياغالي اؤمر..ماكسفش حد
والناس تحاوطه بوشه السمح
ف عرض كلمة تتقال بجد
مرض القلوب للي اندبح
بينزف دموع مايشوفش ورد
والدعوة طبطبة ع القلوب
والنية ليها اعلي صوت
ح تعيش وعينك ف دموع تدوب
دا الخوف حياة...والجبن موت
والفرحة غنوة ولابسها توب
من الاماني وورقها توت
وعشق الحياة ماليان دروب
إسلك ح تسلك وفيها تفوت
وح ترضي...ااااه من القناعة
سر النفوس واجمل حياة
والتوبة لو ف العمر ساعة
شمس الشموس ونورها وضياه
والتقوي مهنة وحرفة وصناعة
لمين عرف طريق الاله
وف قلبه اصرار غريب
والناس بتحفظ كلامه صم
واللي مالهش ف طبه نصيب
ياعيني اتزود همه بعشرين هم
شوية وح يمشي ..ويرجع غريب
يهاجر لدنيا ماعادلهاش اسم
ويرجع يطبطب...بصوته الحبيب
ح يزرع ويحصد...ف ارواح وجسم
....
محمود فاروق
ليست هناك تعليقات:
إرسال تعليق
يشرفني قراءة تعليقك ايا كان... فردودك اثبات وجودك